KONSTITUSIE VAN DIE BERGKLUB VAN SUID

c) Om behulpsaam te wees met die beskrywing van geologiese, mineralogiese, plant- en dierkundige materiaal asook topografiese en klimatologiese opnames en kartering van gebiede.

d) Om toegangsregte tot berg- en natuurgebiede te verkry, uit te brei en te bewaar.

e) Om behulpsaam te wees met die daarstelling en handhawing van wette gemik op natuurbewaring.

f) Om geskiedkundige gedenkwaardighede op te spoor en te help bewaar.

g) Om die land se natuurskoon en watervoorrade te bewaar en te beveilig, brande te bestry en vandalisme te bekamp.

h) Om bergklimmers- en stappersaktiwiteite in Suid-Afrika en elders te

bevorder.

3. BEVOEGDHEDE:

Ten einde die doelstellings van die Afdeling te bevorder, het die Afdeling die volgende bevoegdhede:

a) Die Afdeling het regspersoonlikheid.

b) Om roerende en onroerende eiendom te verkry, aan te koop, te verkoop, te huur of andersins daarmee te handel.

c) Om serwitute en regte ten aansien van grond te verkry en oor te dra.

d) Om lenings aan te gaan met of sonder sekuriteit en om die Afdeling se eiendom by wyse van verband of andersins ter versekering van sodanige lenings te verbind.

e) Om berghutte en ander verbeteringe op onroerende eiendom op te rig.

f) Om 'n lopende of spaarrekening te bedryf en om geld te ontvang, te belê en aan te wend.

g) Om donasies te maak en te ontvang.

h) Om met ander organisasies, Afdelings of liggame saam te werk.

4. ONROERENDE EIENDOM:

Alle onroerende eiendom van die Afdeling sal geregistreer word in die naam van twee Trustees wat deur die Bestuur van die Afdeling aangewys sal word, welke Trustees die eiendome namens en ten behoewe van die Afdeling sal hou.

5. LIDMAATSKAP:

Die lede van die Afdeling sal wees:

a) Gewone lede.

b) Junior lede.

c) Erelede.

d) Lewenslange lede.

e) Plattelandse lede.

6. VERKIESING VAN GEWONE & PLATTELANDSE LEDE:

a) Gewone & plattelandse lede word na aansoek om lidmaatskap deur die Bestuur verkies. Plattelandse lede synde gewone lede wat verder as 150km vanaf Bellville woon.

b) 'n Aansoek om lidmaatskap moet 'n opgawe van die applikant se stap- en

bergklimervaring bevat.

c) 'n Aansoek om lidmaatskap moet deur 'n voorsteller en 'n sekondant plus nog een ander lid onderteken word. Genoemde persone moet minstens een jaar lid van die Afdeling wees.

d) 'n Aansoek om lidmaatskap sal slegs oorweeg word indien die applikant:

i) Volgens die oordeel van die bestuur 'n aktiewe belangstelling

in stap en bergklim sowel as in die aktiwiteite van die Afdeling toon, bereid sal wees om die gees van die Afdeling te handhaaf en die goeie naam van die Afdeling te bevorder.

ii) Minstens een amptelike naweek- en drie amptelike dagtogte van die Afdeling meegemaak het met dien verstande dat die Bestuur in verdienstelike gevalle 'n uitsondering hieromtrent mag maak.

e) 'n Applikant vir Gewone Lidmaatskap moet ten minste 18 jaar oud wees.

f) Indien twee of meer Lede van die Bestuur teen 'n applikant se aansoek om lidmaatskap stem, word so 'n applikant se aansoek nie aanvaar nie.

g) Die Sekretaris stel 'n applikant so spoedig moontlik na sy verkiesing of afwysing skriftelik daarvan in kennis.

h) 'n Aansoek om lidmaatskap kan afgewys word sonder opgaaf van redes.

7. VERKIESING VAN JUNIOR LEDE:

Aansoek om Junior lidmaatskap sal slegs oorweeg word, mits die skriftelike toestemming van die ouer of voog verkry is en sodanige ouer of voog 'n vrywaring geteken het wat die Afdeling en sy lede vrywaar van enige verlies of skade wat mag voortspruit uit enige aktiwiteite van die Afdeling.

Kinders onder 16 kan egter Junior lidmaatskap verkry indien ten minste een van sy ouers lid van die Afdeling is, met dien verstande dat so 'n Junior Lid slegs onder toesig van die betrokke ouer/s aan die Klub se aktiwiteite mag deelneem.

8. VERKIESING VAN ERELEDE:

Erelede vir Lewenslank word op aanbeveling van die Bestuur deur die Lede van die Afdeling op 'n Ledevergadering gekies. Erelede word vrygestel van betaling van ledegelde. 'n Erelid het dieselfde voorregte as 'n gewone lid en alle bepalings van die Konstitusie wat betrekking het op gewone lede is ook toepaslik op Erelede, behalwe indien uitdruklik anders in hierdie Konstitusie uiteengesit.

9. VERKIESING VAN LEWENSLANGE LEDE:

a) Lewenslange lede word na skriftelike aansoek om lewenslange lidmaatskap deur die Bestuur verkies.

b) Slegs persone wat minstens vyf jaar lid van hierdie Afdeling was en wat die ouderdom van sestig jaar bereik het, of persone wat minstens twintig jaar lid van hierdie Afdeling was, kom in aanmerking vir Lewenslange Lidmaatskap.

c) Indien Lewenslange Lidmaatskap toegestaan word, is 'n eenmalige fooi

betaalbaar, soos bepaal deur die Bestuur. Vir lede jonger as 60 jaar moet die fooi egter minstens vyftien maal die geldende ledegeld vir gewone lede bedra.

10. LEDEGELD:

a) Ledegeld en toetreegeld word van tyd tot tyd deur die bestuur bepaal.

b) 'n Nuwe lid moet die toetreefooi en voorgeskrewe ledegeld gelyktydig met sy aansoek om lidmaatskap betaal. Hierdie geld sal terugbetaal word indien hy nie tot lid verkies word nie.

11. BEëINDIGING VAN LIDMAATSKAP

'n Persoon se lidmaatskap van die Afdeling kom tot 'n einde indien:

a) Hy skriftelik as lid bedank.

b) Sy lidmaatskap deur die bestuur beëindig word.

c) Erelidmaatskap kan slegs deur 'n gewone meerderheidsbesluit op 'n Algemene Ledevergadering beëindig word. Die voorneme om 'n Erelidmaatskap te beëindig moet deur die Sekretaris in die kennisgewing vir die Ledevergadering gemeld word.

d) Indien die Bestuur 'n persoon se lidmaatskap beëindig, moet die persoon

skriftelik in kennis gestel word.

12. BEëINDIGING VAN LIDMAATSKAP DEUR DIE BESTUUR:

Die bestuur mag 'n lid se lidmaatskap beëindig indien:

a) Hy na die oordeel van die Bestuur hom skuldig gemaak het aan wangedrag.

b) Indien sy ledegeld nege maande agterstallig is.

13. LEDEVERGADERINGS:

a) Die Bestuur moet elke jaar 'n Ledevergadering belê, indien moontlik voor die einde van Maart. Dié Ledevergadering sal bekend staan as die Algemene Jaarvergadering.

b) Die Bestuur mag 'n Spesiale Ledevergadering belê indien hy dit gerade ag. Die Bestuur moet 'n Spesiale Ledevergadering belê indien minstens ses Lede dit skriftelik versoek.

c) Skriftelike kennisgewing van 'n Ledevergadering moet minstens twee weke voor die vergadering aan die jongsbekende adresse van al die Lede gestuur word.

d) Alle Lede van die Afdeling, behalwe Junior Lede, het stemreg op

Ledevergaderings.

e) Lede mag persoonlik of deur 'n skriftelik benoemde gevolmagtigde stem.

f) Tien lede of 'n kwart van alle lede (welke ookal die minste is) vorm 'n

kworum op 'n Ledevergadering.

g) 'n Ledevergadering is bevoeg om te besluit oor enige saak wat te doen het met die beleid en bedrywighede van die Afdeling en die Bestuur is gebonde aan besluite van 'n Ledevergadering.

h) Die Voorsitter van die Bestuur tree op as Voorsitter van Ledevergaderings.

i) 'n Sakelys moet die kennisgewing van 'n Ledevergadering vergesel.

14. SAMESTELLING VAN BESTUUR:

a) Die Bestuur bepaal self watter portefeuljes noodsaaklik is en hoe

verpligtinge verdeel word, met dien verstande dat al die doelstellinge van die Klub bevorder word, goeie administrasie en finansiële bestuur geskied en skakeling met die res van die Bergklub van Suid-Afrika bevorder word. Die nuwe Bestuur neem die portefeulje indeling van sy voorganger as vertrekpunt en riglyn.

b) 'n Voorsitter en sewe Lede van die Bestuur word deur die Ledevergadering aangewys. Die Bestuur konstitueer verder self.

c) In uitsondelike omstandighede mag die Bestuur ‘n addisionel bestuurspos skep en ‘n kundige lid van die Afdeling koöpteer om dit te vul. Die termyn van sodanige bestuurslid duur soos die van die ander Bestuurslede net tot met die volgende Algemene Jaarvergadering of Spesiale Ledevergadering.

15. VERKIESING VAN DIE BESTUUR:

a) Die Bestuur word op die Algemene Jaarvergadering van die Afdeling deur die lede verkies.

b) Die Bestuur word vir een jaar verkies.

c) Enige vakature wat gedurende 'n ampsjaar in die bestuur mag ontstaan, word deur die bestuur self aangevul.

d) Geen Bestuurslid mag vir meer as vier agtereenvolgende volle ampsjare op die Bestuur dien nie, tensy anders besluit deur 'n Ledevergadering.

e) Geen persoon mag langer as twee agtereenvolgende volle ampsjare as Voorsitter dien tensy anders besluit deur 'n Ledevergadering.

f) Indien 'n Bestuurslid sonder goedkeuring van die Bestuur, vir drie

agtereenvolgende Bestuursvergaderings afwesig is, verloor hy lidmaatskap van die Bestuur.

16. BEVOEGDHEDE VAN DIE BESTUUR:

a) Die Bestuur tree in alle sake namens die Afdeling op onderhewig aan die

bepalings van hierdie Konstitusie en onderhewig aan die besluite van die Ledevergaderings.

b) Die Bestuur moet duidelike taakomskrywings van die onderskeie Bestuursampte opstel en op datum hou.

17. VERGADERINGS VAN DIE BESTUUR:

a) Bestuursvergaderings word na goeddenke deur die Voorsitter belê.

b) Indien drie Bestuurslede dit versoek, moet die Voorsitter 'n

Bestuursvergadering belê.

c) Op alle vergaderings, van die Bestuur, en van die Lede van die Afdeling het die Voorsitter 'n gewone en 'n beslissende stem.

d) Indien die Voorsitter afwesig is, tree die Ondervoorsitter as Voorsitter op. Indien die Ondervoorsitter ook afwesig is, kies die vergadering 'n Voorsitter.

18. SUBKOMITEES:

Die Bestuur is geregtig om subkomitees aan te stel ten einde spesifieke opdragte uit te voer en sodanige subkomitees is geregtig om namens die Afdeling ten aansien van alle sake wat binne hul opdrag val op te tree. Die lede van subkomitees hoef nie noodwendig Bestuurslede van die Afdeling te wees nie. Die subkomitees is onderhewig aan die bepalings van hierdie Konstitusie, voorskrifte van die Bestuur en besluite van die Ledevergadering.

19. BOEKJAAR:

Die Boekjaar van die Afdeling strek van 1 Januarie tot 31 Desember.

20. HANTERING VAN GELDE:

Alle gelde van die Afdeling sal (tensy die Bestuur anders besluit) in 'n bankrekening wat spesiaal vir die doel geopen word en alleen vir die doel gebruik mag word, gedeponeer word. Onttrekkings van gelde uit sodanige bankrekening mag gedoen word onder die handtekeninge van twee uit drie Bestuurslede soos deur die Bestuur genomineer.

21. STAP- EN KLIMTOGTE:

a) Die Bestuur moet vir elke amptelike stap- of klimtog van die Afdeling 'n leier aanwys (wat nie noodwendig 'n lid van die Bestuur hoef te wees nie).

b) Die aangewese leier sien om na die veiligheid en gedrag van alle lede en gaste op sodanige stap- of klimtog en alle lede en gaste is verplig om hom gehoorsaam te wees.

c) Die aangewese leier sal die stap- of klimtog so reël dat die goeie naam en gees van die Afdeling gehandhaaf word.

d) Na elke stap- of klimtog moet die aangewese leier 'n kort skriftelike verslag by die Bestuur indien, welke verslag die name van lede en gaste wat die tog meegemaak het, moet bevat.

e) Nie lede onder agtien jaar en Junior lede onder sestien jaar, moet vergesel word deur 'n volwasse persoon wat volle verantwoordelikheid vir hulle aanvaar.

22. WYSIGING VAN KONSTITUSIE:

Hierdie Konstitusie kan gewysig word deur 'n besluit van twee-derdes van die teenwoordige lede geneem op 'n Ledevergadering mits die voorsteller en sekondant van sodanige voorstel tot wysiging minstens drie weke voor die betrokke Ledevergadering aan die Sekretaris skriftelik kennis gegee het van hul voorstel, welke voorstel die Sekretaris minstens twee weke voor die betrokke Ledevergadering aan die Lede moet pos.

23. ONTBINDING:

a) Die Afdeling ontbind deur 'n besluit, van twee-derdes van die

teenwoordige Lede, geneem op 'n Ledevergadering mits die voorsteller en sekondant van sodanige voorstel tot ontbinding die Sekretaris drie weke voor die betrokke Ledevergadering skriftelik van hul voorstel in kennis gestel het en mits die Sekretaris minstens twee weke voor die betrokke Ledevergadering kennis van sodanige voorstel aan die Lede gepos het.

b) Wanneer daar tot ontbinding oorgegaan word, sal die Ledevergadering twee persone verkies wat sal optree as likwidateurs van die bates en laste van die Afdeling. Die likwidateurs se magte en vergoeding sal op sodanige Ledevergadering bepaal word.

c) Die likwidateurs sal alle bates wat nie benodig word vir betaling van skulde, of vir hul vergoeding nie, oordra aan die Sentrale Komitee van die Bergklub van Suid-Afrika.

24. FINANSIES:

Die Afdeling sal nie enige van sy inkomste of fondse aan enige persoon laat toeval nie. Alle fondse sal slegs aangewend word vir die doel waarvoor dit ingesamel is, naamlik om te voorsien in die ontspannings en sosiale behoeftes en aktiwiteite van die Lede van die Afdeling.

-------oo0000oo--------

Gewysig soos goedgekeur op Algemene Jaarvergadering 22 Februarie 2003.